అంజనీపుత్ర రియల్ ఎస్టేట్పై సందేహాల వెల్లువ.
ప్లాట్లు, రోడ్లు, రిజిస్ట్రేషన్లు, లాభాల హామీలపై ప్రశ్నలు…
అధికారుల విచారణకు డిమాండ్
అగ్నిధారన్యూస్ ,(ప్రత్యేక ప్రతినిధి)
రాష్ట్రంలో రియల్ ఎస్టేట్ రంగంలో ఆకర్షణీయమైన ప్రకటనలతో పెట్టుబడిదారులను ఆకట్టుకునే ప్రయత్నాలు ఊపందుకున్నాయి. ఈ క్రమంలో ‘అంజనీపుత్ర రియల్ ఎస్టేట్’ సంస్థ చేపడుతున్న వెంచర్లు, శ్రీగంధం సాగు పేరుతో ఇస్తున్న హామీలు, ప్లాట్ల విక్రయ విధానంపై పలు ప్రశ్నలు తలెత్తుతున్నాయి. ప్రజల్లో వ్యక్తమవుతున్న సందేహాలకు సంస్థ నుంచి స్పష్టమైన వివరణ రాకపోవడంతో వివాదం మరింత ముదురుతోంది.
15 ఏళ్లలో కోట్ల ఆదాయం…?
ప్లాట్ కొనుగోలు చేసిన వారికి శ్రీగంధం మొక్కలు నాటి, వాటి నిర్వహణను సంస్థే చేపడుతుందని, 15 ఏళ్ల తర్వాత భారీ ఆదాయం వస్తుందని ప్రచారం చేస్తోంది. అయితే ఇప్పటివరకు ఈ విధానంలో విజయవంతంగా చెట్లు విక్రయించి పెట్టుబడిదారులకు లాభాలు అందించిన వివరాలు బహిరంగంగా వెల్లడించలేదని పలువురు ప్రశ్నిస్తున్నారు.
వ్యవసాయ భూముల్లోనే ప్లాట్లు?
వ్యవసాయ భూములుగానే రిజిస్ట్రేషన్ చేస్తూనే, అదే భూమిలో 30 అడుగుల రోడ్లు, వెంచర్ సౌకర్యాలు చూపిస్తూ ప్లాట్లు విక్రయించడం ఎలా సాధ్యమవుతోందన్న సందేహాలు వ్యక్తమవుతున్నాయి. లేఅవుట్ అనుమతులు, రోడ్ల యాజమాన్యం, రెవెన్యూ రికార్డులపై స్పష్టత లేకపోవడం కొనుగోలుదారుల్లో ఆందోళన కలిగిస్తోంది.
డాక్యుమెంట్లలోనూ గందరగోళం
కొన్ని రిజిస్ట్రేషన్ పత్రాల్లో ప్లాట్ యజమాని పేరు ఒకరిది కాగా, పక్కనే రోడ్డు భూమి మాత్రం మరో వ్యక్తి పేరుతో నమోదై ఉండటం గమనార్హంగా మారింది. భవిష్యత్తులో రోడ్డు భూమిపై వివాదాలు తలెత్తితే బాధ్యత ఎవరిదనే ప్రశ్నలు వినిపిస్తున్నాయి.
శ్రీగంధం సాగుపై నిపుణుల అభిప్రాయం
వ్యవసాయ నిపుణుల ప్రకారం శ్రీగంధం సాగుకు అనువైన భూసారం, వాతావరణం, దీర్ఘకాల నిర్వహణ అవసరం. నాణ్యమైన గుండెకట్ట ఏర్పడేందుకు 12 నుంచి 15 సంవత్సరాల సమయం పడుతుంది. అందువల్ల భారీ లాభాల హామీలను శాస్త్రీయంగా పరిశీలించాల్సిన అవసరం ఉందని వారు సూచిస్తున్నారు.
అధికారులు స్పందించాలనే డిమాండ్.
వెంచర్ల చట్టబద్ధత, రిజిస్ట్రేషన్ విధానం, లేఅవుట్ అనుమతులు, రోడ్ల యాజమాన్యం, శ్రీగంధం నిర్వహణ ఒప్పందాలపై రెవెన్యూ, రిజిస్ట్రేషన్ శాఖలు సమగ్ర విచారణ చేపట్టాలని పలువురు కోరుతున్నారు.
కొనుగోలుదారులకు సూచనలు.
భూమి కొనుగోలు చేసే ముందు సంబంధిత లేఅవుట్ అనుమతులు, రిజిస్ట్రేషన్ పత్రాలు, రెవెన్యూ రికార్డులు, రోడ్ల యాజమాన్య వివరాలు, న్యాయ నిపుణుల అభిప్రాయం తప్పనిసరిగా పరిశీలించాలని నిపుణులు సూచిస్తున్నారు.